Die ander Art zůuersetzen ist / da du dein widerpart in einem streich zůglich versetzest vnd verletzest / welches die alten fúrnemlich wie deñ billich loben / daher das sprichwort erwachsen / ein rechter Fechter versetzet nicht / sonder Hauwet man so Hauwet er auch / trit man so trit er auch / sticht man so sticht er auch.
Von ersten soltu nun wissen / das der Oberhauw alle andere Háuw als den Zorn / Mittel / oder Uberzwerch vnnd Vnderhauw / von Oben vndersich dempffet / auff diese weiß wann du jhm auß seinem Hauw springest / vnd zůgleich auff seinen Hauw in dem er herfleucht mit sterck Hauwest / damit du jhm so du anders recht antroffen / sein Wehr dermassen schwechst / das du den andern wol zů seinem leib Hauwen kanst / ehe er sich recht erholet. Wie nun der Oberhauw die andern streich alle von Oben nider dempfft / so würdt er von dem Zorn oder Uberzwerchhauw abgetriben / vnd nimpt auch der Vnder so er mit sterck geschicht / vnnd dem mit außtretten geholffen wirdt / die Oberháuw vbersich aus.
Wo aber zwen gleicher háuw mit jhren zůgeordneten tritten also zůsamen geschehen / das ein trit ein wenig vor oder nach dem andern / wie das auch augenblicks geschicht / so bringen sie ihre versatzung mit / diese versatzung aber ist begriffen in den ersten vnd geraden Háuwen / die ander versatzung aber ist / da du zůgleich versetzest vnd triffst / geschicht mit den verkehrten hauwen als den Schielhauw / Glütz / Kron / vnnd Zwirchhauw / wie solches denn volbracht / hastu Oben bey erklerung jeden Hauwes gehórt.
Dann solche verkehrte Háuw sind fúrnemlich darzů erfunden / das damit zůgleich versetzt vnd getroffen wirdt. Aber damit ich nichts hindergehe / so du zů mehrerm verstand vnd vnderweisung mócht gerathen / will ich ein Exempel des versetzens mit dem Zwirchhauw geben.
