Der Ochs mit.
AUß disen bißher gelerten stucken / hoffe ich du habest genugsame anleitung / vnd bericht zů nemmen / wie du deine hauw vnd stuck gegen des Manns vier Blóssen anschicken / auch wie du bißweilen ein winden / Schnit / Item ein Ablauffen / Zirckel vnd ein verfliegen damit lauffen lassen solt / welches aber nicht allein auß disen in welchen solches erzelt / sonder sol auch von allen andern Legern den mehrertheil zůfechten verstanden werden. Derwegen dieweil der Ochs ein sonderlich gůt Leger dein widerpart anzůgreiffen / will ich in disem / wie du den Mann im Vor angreiffen / vbereilen / vnd dir zůuersetzen zwingen solt / ein kurtze lehr vnd regel geben.
Vnd merck fúr das erste / das du von einer jeden seiten vier fúrnemer angrif hast / nach außweisung der vier Haupt linien / wie solches anfangs des Capitels augenscheinlich zůsehen fúrgestelt / welche Lini sein die rechten strassen aller Háuw so von dir gegen deinem gegenfechter geführet vnd gehauwen werden.
Derhalben wann du mit dem Sturtzhauw gegen deinem Mann zůgehst / welcher Sturtz so du also den ort gegen dem Mann haltest vnd still heltest der (wie oben gelehrt) von wegen seines zeigenden stoß genant wirt / aus welchem du nun so bald dein gegen fechter erlangen / angreiffen kanst / es sey von Vnder oder Oben / schlims oder vberzwerch / wie solches die Lini zůgegen anzeigen / zů welcher Lini du nun von einer seiten angreiffest / gegen derselbigen soltu auch vberzwerch oder vbereck dargegen Hauwen / es sey mit Langer oder halber schneide / oder mit der flech / So du sie jhm Vor gewaltig vnd behend volbringest / zwingest du jhn das er dir andere arbeit ohn sein danck auch zůlassen mus / dann ob er schon dargegen zůfechten sich arbeitet / so bistu jhm doch schon auff dem hals / mit nachreisen / schneiden / trucken vnd dergleichen nach zůfolgen / damit du jhn zů keiner volkommenen arbeit kommen lassest / also seind auch bißher gelehrte stuck auff disen grund / beide im angreiffen vnd im nachfechten gerichtet / Exempel.
Wann du im zůfechten durch den Sturtz in die Hůt des Ochsens kommest / so hauwe (als bald du jhn erlangen kanst) einen gewaltigen Zornhauw von deiner Rechten schlims gegen seinem Lincken ohr / mit einem weiten zůtrit deines Rechten fůßes / als bald der Hauw immer rühret oder trifft / so bald zůcke wider vmb vnd hauwe dar=
