So greiff sein rechtenn arm mit deyner linkenn handt vnd truck den vast an dein prust vnd wend dich von Im auf dein prust rechte seitten vnd faß In auff dein Rechte hufft vnd wurff In fur dich
Item Auch magstü In auß der vnntern hutt auch zw Schlagenn mit dem knopff wen es dir Eben Ist
Das ist die dritt hutt mit dem kurtzenn Schwertt zw kempffenn
Halt dein Schwertt mitt beiden henndenn als vorgestriben [!] steet vnd leg es vber dein linkes knye vnd daraüß prich Im alle sein Stuck mit versetzenn
Item Sticht er dir aus der obern hutt zwm gesicht vnd setzt den Stich ab mit dem Schwertt vor deyner linken handt gegenn seyner rechten seytten vnd far auff In die obern hutt vnd setz Im an
Item oder far auff mit dem Schwertt vnd versetz den obern stich zwischen deinen beyden hendenn vnd far Im mitt dem knopff vber sein versatzte hand vnd Ruck da mit vntersich vnd setz Im ann Item auch vinstu hernach geschribenn wie dw auß der dritten hutt die Schleg die man Schlecht mit dem knopff versetzen solt
Das ist die vierd hutt mit dem kurtzen schwertt zw kempffenn
Halt das Schwertt mit beyden henndenn als vorgestriben [!] steet vnd halt es mit der hand hab vnter dein Rechte vchssenn vnd setz das gehultz forn an die Brust das der
