MOtus · das worte schone /
ist des fechtens eyn hort vnd krone /
der gancze materiaz /
des fechtens / mit aller pertinencia /
Vnd der artikeln gar /
des fundamentes / dy var /
Mit namen sint genant /
vnd werden dir hernoch bas bekant /
Wy denne eyner nur ficht /
zo sey her mit den wol bericht /
Vnd sey stetz in motu /
vnd nicht veyer wen her nu /
An hebt czu fechten /
zo treibe her mit rechte /
Vmmer in vnd endlich /
eyns noch dem andern künlich /
In eyme rawsche stete /
an vnderlos imediate /
Das iener nicht kome /
czu slage des nympt deser fromen /
Vnd iener schaden /
wen her nicht ungeslagen /
Von desem komen mag /
tut nur deser noch dem rat /
Vnd noch der leren /
dy itczunt ist geschreben /
So sag ich vorwar /
sich schützt iener nicht ane var /
Hastu vornomen /
czu slage mag her mit nichte komen /
¶ Hie merke · das · frequens motus · beslewst in im / begynnüs / mittel · vnd ende / alles fechtens / noch deser kunst vnd lere / alzo das eyner yn eyme rawsche / anhebunge / mittel / vnde endunge / an vnderlos vnd an hindernis synes wedervechters volbrenge / vnd ienen mit nichte lasse czu slage komen / wenn of das gent dy czwey wörter · vor · noch · das ist / vorslag vnd nochslag / inmediate & / in vna hora / quasi vnum post reliquum sine aliquo medio /
