Page:MS Bibl. 2465 71r.jpg

Sticht einer ein oberstich vff dich mit zorn / so fall ihm mit der handt vnder sein rechten arm / vnd begreiff ihn hinder dem elenbogen fest / vnd stich ihm zu dem achsel schloß vornen / oder zum hertz griblin / oder Ins gesicht / als baldt stich dich von ihm durch zwen zwirch stich / von beiden seitten / nach seinem rechten arm / du magst auch werffen vber ein bein ⁋

Item vnderlauff ihm sein oberstich / wie itzt gelertt mit deiner lincken / vnd greiff ihm sein furgesetzten schenckel mit dem dolchen ruck ahn dich / stos oben von dir / so felt er ⁋

Item sticht einer von oben so halt dein hendt kreutzweiß / dein recht handt oben / das der dolch langs des arm lige / fang ihm also den arm zwischen dein beidt hendt In der versatzung begreiff ihm sein dolchen mit ebiger handt / vnd brich von dir vmb auff dein Lincken seitten / Bruch / thrit mit dem Rechten hinder sein Lincker bein vnd greiff mit der Lincken handt ahn sein Rechten elenbogen wirff ihn vber dein recht bein. ⁋