Page:MS Dresd.C.93 010v.png

das sie Im sein haupt abschlugen vnnd sein Hirnschal Inn Silber oder Gold · nach Jedes vermögen · einfasten · vnnd an den Festtagen · daraus truncken · vnnd liessent auch Ire kinder · vnnd sunst niemand daraus trincken · Er hette dann zuuor zeugknuß · das er ein taugennlicher mann zu der gewhor were · vnnd Im krieg ainen oder mer vom leben zu dem tod gebracht hette · Diser vnnd sunst kainer · dorft aus disem Erngeschirr trincken · Gar kainen kaufman haben sie zu Inen komen lassen · der frembden klaidung oder Kirsenwerckh Clainater vnnd anndre gezierd · zufieren wollen · seÿndt auch aus Ier manier der klaidung nie komen · haben kain frembde zugeprauchen nicht gestattet · Mit diser gewonhait seind die Teutschen anfengcklich herkomen · vnnd haben sich dermassen · so vesst vnnd tapffer darinnen gehallten · das sie durch Ir mannliche redlichkait · gar nahe · alle Lannd · Als Hispanien · Franckreich · Italien · Grecien · Asien vnnd Aphrica · durchzögen · bekriegt · bewont · vnnd vesste Stät dar Innen gebaut haben Vnd den Römern · durch ettlich hundert Jar · grossen abpruch mit Irer Ritterlichen übung vnnd streiten bewisen · an mer Orten vil schlachten mit Inen gehallten · Jetz ob dann vnnden gelegen vnnd zuletst auß Teutschen Lannden gar vertriben biß zuletst Julius · der erst Kaiser · das tail so Jetzund Frannckhreich genannt wirt · aber derzeit ( · wie Auentinus · schreibt · ) Teutsch gewesen · durch siben Jar lanng bekriegt vnnd erobert Vnnd also den Reinstram zu ainer grenitzen des Römischen Reÿchs gemacht hat · Es haben auch die Kriegßweiber · so die Lateiner Amazones nennen Iren vrsprung von den Teutschen · die mit grossem hauffen das Lannd Scithia eingenomen · vnnd lannge zeit darInnen gewont · vnnd anndre lender daraus bekriegt haben · Sie seind auch vnnder Irer Kunigin · Pentasalia · vor Troia Im streit wider die Griechen Inn allen Ritterlichen Rustungen · zu Roß vnnd Fuoß · mit grossen eern gesehen worden · · Das ist nun vngefarlich mit ainer kurtzen Summarien das herkumen vnnd gesatz vnnserer alten Teutschen · so Inen von dem Kunig Tuiscon · dem Engcklin · Noe · vnnd Herman · Irem Kunig · furgeschriben vnnd zuhallten aufgesetzt worden sein ·

Auß disem · guthertziger Fechter vnnd Leser · kanstu abnemen was dise harte Ritterliche vbung · so vnsere vralten Teutschen so veest gehallten · allem Teutschland · für ain grosse Freÿhait · Eer · vnd ewigs lob geben hat · Vnnd wann es noch also Inn Teutschen lannden ( · der Ritterliche vnd Manliche übung halben · ) stuende · vnnd die Ritterliche Kunst · Inn so hohem werdt gehallten · vnnd daneben andere ·