Register
Hernacher volgt das Register wellichs alle Gewhören · wie die Inn disem Kůnstfechtbůch · nachainnander gerichtet worden sein · Inn sich halltet ·
Das schwert ist das vralt haůptstůckh · dar Innen aůch beÿ Jůden · haiden vnd Christen · vil Ritterliche übůng gehallten worden · vnnd noch heůtigstags die Maisterschafft · dar Innen probiert wirt · Inn wellichem · 120 · stend mit allerlaÿ abwechßlůng · průchen · vnnd heŵ · nach dem Kůnstlichisten · mit possen vnnd schrifften begriffen seind / ·
Der Tůsegk wellichen die Allten Messer genannt haben · Vnd sich das Redlich volckh · die Sparthaner dessen vast gebraůcht · vnnd dardůrch grosse Ehr eingelegt haben · hat schrifftlich vnd mit bössen 40 · stend Inn sich hallten ·
Das Stennglin hat seinen vrsprůng von den Römern vnnd Persiern · wirt an Stat der Schefftlin gebraůcht · hatt gar gůter stend · 18 · Inn Im begriffen ·
