Page:MS Dresd.C.93 219v.png

Ein oberer schlag gogen ainem abnemen

Item wann Ir zusamen gond So schickh dich also Inn dises stuckh stannd mit deinem lincken fuosz vor. vnnd hallt dein Truschell mit deiner rechten hand oben Inn deiner stanngen dein lincke bey deinem vnndern Ort. Indes schlag Im mit deinem flegel nach seinem haupt. schlecht er dir also zu vnnd du auch mit deinem lincken fuosz gögen Im steest vnd helst. dein Truschel mit deiner lincken hand bey deinem vnndern Ort. dein rechte miten Inn deiner stangen so trit mit deinem rechten schennckel hinnein vnnd Nimb Im das ab mit deiner Stanngen auf dein rechte seiten. Inn dem volg mit deinem lincken schennckel hinnach vnnd schlag Im mit deinem Flegel nach seiner rechten seiten. seines leibs schlecht er dir also. zu. so trit mit deinem lincken schennckel zuRuckh vnd nimb Im das ab mit deinem Flegel auf dein rechte seiten. Indes trit behend Inn trianngel vnd schlag Im mit deinem Flegel nach seiner rechten seiten trit damit von Im zuRuckh