Page:MS Dresd.C.93 220r.png

Zwen anpund Inn der Truschel

Item hallt dich also mit Disem stuckh. wann Ir zusamen gond stannd mit deinnem lincken fuosz vor vnnd hallt dein truschel Inn dem anpund mit deiner linckhen hand bey deinem hindern Ort dein rechte mitten Inn deiner stanngen. Indes schlag Im mit deinem flegel nach seinner rechten seiten seines haupts. schlecht er dir also oben zu. vnnd du mit deinem rechten fuosz gögen Im steest vnnd helst dein Truschel auch mit deiner rechten hand miten In deinner stanngen. dein lincke Inn deinem vnndern Ort. so far mit deiner Truschel seinem schlag entgögen vnd pind Im an. sein stanngen seiner Truschel. nimb Im damit seinen schlag hinweckh auf dein lincken seitten Inn dem volg mit deinem lincken schennckel hinnach vnnd schlag Im mit deinem Fflegel nach seiner rechten seitten seins leibs. Schlecht er dir also nach deiner rechten seitten so nimb Im das ab mit deiner Truschel auf dein lincke seiten Inn dem trit mit deinem rechten schennckel auf sein lincke seiten vnd schlag Im mit deinem Flegel nach seinem haupt. trit damit von Im zuRuckh