Item du solt wissen wenn ainner auf dich Reit mit ainner glevven Wie dü dich gegen Im schicken solt mit deinner gleven, also das du Im die seinnen mit ablattest unnd mit deinner treffest unnd die Kunst soltu treiben auß vier schickunng oder huten. Merck der hut sein dreii mit der ganntzen gleven unnd ainne mit der halben.
Item schickh dich also mit der Ersten hut,
faß dein gleven auf das lengst vnnder den Arm unnd halt Im den Ort gleich gegen dem gesicht.
Item schickh dich also mit der anndern hut,
faß die Gleven als vor unnd thuo als sii dir zu schwer seii unnd sennckh sii nider zu deinner linncken seiten und hallte sii neben deinnes Roß hals.
Item die dritt hüt
faß dein Gleven mit baiden hennden Inn der mitte unnd legs sie fur zwerchs auf den sattel.
