Hie merckh wie du Ainnem sein schwert nemen sollt unnd In darzu behallten, das er sich nit geweren mag.
Item Reijtt zu der Rechten seitten unnd such sein Ploß wie du magst, mit hawen oder mit stechen, versetz er unnd kumpt nachent an dich so begreiff sein rechten arm hinnder seinner rechten hand, mit deiner linncken unnd verkerten hannd, unnd ruckh den fur dich unnd hallt In feest hin beij unnd beij deinnem linncken arm ausswendig an sein pind seinnes schwerts, so muoß Er das schwert lassen fallen, unnd wann du In allso beij dem Arm halltest, so magstu In mit dem schwert schlagen, oder mit dem schopffgriff werffen, wie du willt, oder mit dem zaum fahen.
Item das Leert die Funffunndzwaintzigist Figur und spricht die messer nemmen unnd behallten gedennckh.
Den ungenannten
den starcken
verwennd Ir stechen
Ir schlagen verdirbt onn alles fechten.
