Wiktenauer logo.png

Page:MS KK5126 110r.jpg

From Wiktenauer
Jump to navigation Jump to search
This page needs to be proofread.

Vier leger allain
vonn halt vnnd fleuch die gemain
Ochs pflueg alber
vom tag sey dir nit vnmar

Glosa merchk die vier leger oder die vier hüettenn aus denn dw fecht<e>n Sold

die erst huet haist der ochs da schick dich also mit ste mit dem tenncken fuess vor vnd halt dein swert neben deiner rechtenn seyten das dein gehilcz vor dem hawbt ste vnd der ort dem man gegen dem gesicht

jtem zw der tenncken seytenn schick dich al so in dem ochsen ste mit dem rechten fuess vor und halt dein swert neben deiner tencken seytenn mit dem gehilcz vor dem hawbt das die lanng sneyd gegen dir ste vnd in dem ort gegen dem gesicht der ochs zw paidenn seytenn

die ander haist der pflueg Da sichtkin[1] dich also mit secz denn tennckenn fues vor vnnd halt dein swert mit gechrewczten henndenn mit dem chnopf vndersich nebenn deiner rechten seytenn zw der huf das die churcz sneyd obenn sey vnd der ort im gegenn dem gesicht[2]

jtem zw der tenncken seytenn Die ander huet haist der pflueg da schick dich also mit secz den tenckenn fues vor vnd halt dein swert mit gechrewcztenn henden mit dem chnopf vndersich neben deiner rechtenn Seytenn zw der huf das die kurcz sneyd obenn sey vnd der ort im gegn dem gesicht

jtem zw der tenckenn seyten schick dich also in dem pflueg secz den rechten fuess vor vnd halt dein swert neben deiner tencken seyten mit dem chnopf vndersich zw der huff das die lang sneyd obenn sey vnd der ort im gegn dem gesicht das ist der pflueg zu paiden seytenn

Der trit haist der alber da schick dich also mit secz den rechtenn fuess vor vnd halt dein mit geracktenn armen vor dir mit dem ort auf der erdenn vnd das die churcz sneyd oben sey

Das ist der text ob dir verseczt ist wie das dar chumen ist

Der vierd huet haist vom tag da schick dich also mit Secz deinen tennckenn fues vor vnd halt dein swert an der rechtenn achsel oder mit auf gerucktem armen hoch vber dem haubt und ste also in der huett

Das ist d<er> text von dem verseczen

[V]jer seind der verseczenn
die die leger auch ser leczenn
vor verseczenn huet
geschicht das auch ser nucz dich

glosa dw hast vor gehort von den vier huett<e>n so solt nun wissen was seind die vier verseczenn die vier huett<e>n prechenn wis das kain verseczen nicht dar zue gehort wann es sein vier haw die Sy prechenn

der erst haw das ist der chrump haw der pricht die huet aus dem ochsenn

jtem der ander jst der twirch der pricht die huet vom tag

jtem der trit haw ist der schilcher der pricht die huet die do haist der pflueg

der vierd haw das ist der schaitler der pricht die huet die do haist alber

vnd wie dw die vier hueten mit den heUenn prechen sold das findest vor in den hewenn geschribenn darvmb hüet dich das dw nicht vil verseczt wildw anders nicht geslagenn werdenn

das ist der text

ob dir verseczt ist
vnd wie das jst dar chumenn
hor was ich dir rate
reys ab haw snell mit drate

glosa wenn dier ainer verseczt hat vnd wil sich vom swert nicht ab ziechen vnd maind er well dich zw chainem stuck nit lassen chumen so thue als dw dich vom swert wellest ab ziechenn vnd zuck dein swert an dich vncz zw der halb<e>m klingen vnd far da mit pald wider am swert auf vnnd haw im snell mit dem duplier<e>n oder mit der churczen sneydt zw dem chnopf

wen er dir verseczt hat so reyb mit deinem swert an seiner swerczklingenn vber sich auf gegen seinem ort als dw im oben ab we//llest nemenn vnd pleib am swert vnd haw im an der klingenn mit der langenn sneyd wider ein zum kopf

Das ist der text von vier an seczen

secz an vier ennd<e>n
pleib darauf lere wildw enden

glosa

  1. Schreibfehler: schick dich
  2. Repetition