Item Also brich auch die zwei stuck so er dir den ortt setz vff din brust in die beide siten so briche die mit dissen zwichen stucken du magst auch din messer fallen loßen vnd mit beiden henden die egemelt bruech machen ~
Sequitur Vier sint der hengen
Vier sint der hengen
Darus lere haulb stich schnit erkemen
In allem gefert
Leger weich oder hart
Hie lert der meinster wie du die vier hengen machen solt im messer vnd wie die genant sÿ also endet sich eyn ÿttlichs mit namen eyns nach dem andern ~
Item der erst heisset der eber von beiden siten Daß ander der stier auch von beiden siten vnd darin soltu gar woll geubet sin also dz du die arbeit daruß gar wol triben magst Auch soltu wissen dz vier hengen sint zwien vnten vnd zwein oben vnd wie sie genant sint hastu oben gehortt
Nün vß den vier hengen soltu acht winden pringen vnd die selbigen acht winden soltu also wegen dz du vß ytlichen winden solt machen stich schnit etc
