Wiktenauer logo.png

Page:MS M.I.29 131r.jpg

From Wiktenauer
Jump to navigation Jump to search
This page contains changes which are not marked for translation.

This page has been proofread, but needs to be validated.

die dünder schleg du ein auch vnder die ougenn schlagenn in daß visier ~

Item merck wiltu eynenn vber danck in dem kreiß vmb furenn so griff nach eynem finger zu der lincken hant vnd brich vbersich oder stich ym obenn zu dem hantschuch in die hant vber sich vnd fur In auß dem kreiß dz ist gut vnd auch vorborgen

Item wiltu eynen man werffenn der dir hat an gesetz so vber griff mit der lincken hant vber sin lincke vnd nym daß gewiechtt peÿ synem lincken elnbogen

Item wider daß wan er griffen will so prich im die hant vorn bÿ dem glitt mit dem schwertt

Die ander hut

Item Nÿm daß schwert in beidenn hend vnd halt es vber dyn knye vnd gee zu dem man Sticht er dir vnten zu wind im nicht Sunder setz ym an sin gesicht

Item sticht er obenn zu Eß sy zu dem gesicht oder wo es sÿ daß soltu werenn vnd setz ym den stich ab mit dem vordern teill dines schwertes vnd setz Im In daß gesicht oder in den druessell vnd schlag din swertt vnter dÿn vchßenn vnd dring vor dich

Item Oder setz ab zwuschen dinen beyden henden vnd far ym mit dem knopff vmb sin hals vnd vor setz ym mit dynem rechten fuß vnd fell in also ~