Item wen er dir den knaupff begriffen hat So wind mit dinem knaupff von vnden auff außwendig vmb sin lincke hant vnd schub mit dinem rechten pÿn fursich vnd stoß in mit diner clingen an sin lincken arm
Das ander stueck
Item Stich ÿn vber den ersten stich inwendig zu sin gesicht vnd thün zu dem andern mall als du ÿm aber zu dem gesichtt stechen wilt Indes far durch vnd satz ÿm vswendig zu sinem gesicht wen er dir dz werett so schrit mit dinem rechten peyn hinder sinen lincks vnd stos ÿn mit dem gehultz in sin lincke vchschen vnd stoß inwendig so felt er ~
Item wo er dir daß thutt so schrit mit dinem lincken peyn hinder dich vnd vohe den stoß zwüschen din beyde hant in die clingen vnd wind mit dem knaupff von vnden auff zwischen vber sin lincke hant vnd spring mit dinem linck peyn hintter sin rechtes vnd stoß ÿm beÿde swertt vber sin hals so hastu ÿm den rueck an gewunen ~
Das drÿtt stuck
Item Stich im aber zu sinem gesicht in wenig vnd far in den andern vnd stich ÿm vßwendig zu sinem gesicht wirtt er dir daß aber So schub mit dem lincken peyn zwueschen sin beÿde hende vnd griff mit dinem knaupff außen vber sin linckes peyn in sin knÿepug vnd leg dich mit diner lincken achsell oben fast vmb yn vnd hebe vnt fast auff vnd truck auff sinen lincke sytenn ~
