Item ein gut ler,
hastu einen vnter dich geworffenn, so schneid oder Reiß ein groß stuck aus seinem Woppenrock, vnnd stich im in das Visier mitt dem degenn, vnnd laß im das nit ausgewinnen das ist gut wenn es kotig oder staubig ist, wirf im das Visier voller staubs oder gemülb, oder stich erdenn aus mit dem degen, vnnd wirff im das in das gesicht.
Aber ein lere,
Merck magstu kein plosling gesten [!], so schneid Im auff denn wopenrock auf den armen, oder die hosenn, vnnd was du sichst vonn nesteln das schneid auf, do findestu etwas das dir gutt wirt, vnnd sihe gar ebenn auf sein degenn, das er dir damit nit schad.
Merck du magst in auch schlagenn mit dem kopf, oder stossenn tzu dem hertzenn wie er leit, oder tzu den achselnn, oder tzu andern gelenckenn.
Merck in dem Verreidenn, schlag oben oder vnten ann sein enckel, vnnd tzeuch oben auf sein seittenn
