Zwenn ober schnit
Item: schickh dich also Inn den obern schnit stand mit deinnem rechten fuoss vor und schneid In gestrack von oben nider auf seinnem rechten arm, wirt er des schnits gewar, so greif mit deinner linncken hand auf deinnes duseggen, rucken unnd schneid In mit der sterck von dir, Segert er dich also mit der sterck zu Schneiden und du mit deinem rechten fuoss vor steest, so trit mit dem rechten zuruck so geestu Im auf dem schnit, Inn dem gee mit deinnem rechten fuoss wider hinnein mit deinem duseggen uber dein haupt das die lanng schneid oben gewenndt sey, der Ort zu ruck hanng, Indes volg mit deinnem lincken schennckel hinnach und haw ain zwifachen haw nach seinem haupt, begert er dir das zu uersezen mit der zwirch, so greiff mit deinner lincken hand uber sein rechten hand unnd Nimb Im die versazung hinweck, so magstu Im wider der obern plosse zu hawen, Hawt er dir also zwifach deiner obern plosse zu, so greiff mit deinner lincken hand nach seinem rechten Elenpogen und wend In also von der haw oder schneid In damit zu seinem haupt.
