Einn einschiessen gogen der Kron
Item: schich dich Also mit dem Einschiessen sezt deinnen rechten fuoss fur unnd scheuz Im denn Ort nach seinnem gesicht oder der prust mit gestracktem arm, scheust Er dir also den ort nach deinnem gesicht unnd du gogen Im steest Inn der Kron deinen linncken fuoss fur gesezt, so nimb Im das hinneck mit der Kron, Indes wind dich auss der Kron Inn die versazung dein duseggen uber dein haupt, volg mit deinnem rechten schennckel hinnach und haw Im von unnden nach seinnem rechten arm, versezt er dir das, so lass ablauffen und haw Im oben nach seinner rechten seitten, hawt Er dir also unnden und oben zu, so fall Im Krump ein uber seinen rechten arm und trit mit deinnem linncken schenckel hinnein, sez dein lincke hand an seinnen rechten Ehrpogen, scheub In damit vonn du, so magstu In oben zu dem kopff hawen, hat er dir dann angesezt und scheubt dich also von Im, so zeuch deinner rechten fuoss zuruck, so gastu Im auss dem ansezen unnd kompst mit Im zu gleicher arbait, Indes such Im mit deinnen ort zu seinem gesicht, sezt Er dir das ab, so trit mit deinnem rechten schennckel wider hinein und haw Im von unden zu seiner lincken seiten, Indes haw dich mit ainnem oberhaw von Im
