Ein Zwirchhaw gogen dem Krumphaw
Item: schich dich also mit disem zwirchhaw, trit mit deinnem lincken schennckel hinnein und haw Im gestracht mit ainnem zwirchhaw nach seinnem haupt seinner rechten seiten, zwircht Er dir dann also zu unnd du mit deinnem rechten fuoss vor steest, so volg mit deinnem lincken hinnach unnd fall Im krump an aus sein rechten seitten, Indem schneid In durch sein angesicht unnd haw Im nach seinnem rechten arm, versezt Er dir das, so haw Im von unden nach seinner rechten seiten, hawt er dir also unden zu, so greiff mit deinner lincken hand oben uber sein rechte unnd truck damit unndersich, so ist Im der haw geprochen unnd haw Im oben zu dem haupt, hat er dich also gefast, so trit mit deinnem rechten schennckel hinnein und greiff mit deinner lincken hand nach seinnem rechten arm, so nimbstu Im den haw damit hinweck und magstu mit Im zu gleicken arbait komen, ist er also Inn gleicher arbait mit dir, so haw Im Inndem krad zu der schaittel, versezt Er dir das, so spring mit deinnem lincken fuoss wol auf sein lincken seiten und far mit dem duseggen auf uber das haupt unnd haw Im behennd zwifach oben ein, hawt er dir also zwifach ein, so sez Im das Krump ab mit deiner kurzen schneid, so magstu Inn darnach hawen oder scheiden
