So merck versetzt er dir ainen oberhaw so var Im in der versatzung mit dem knopf über sein versetzte hand vnd reiss damit vndersich ab vnd mit dem reissen schlag In mit dem swert auf den kopf Dw magst darnach mit der lincken handt wol in die klingen vallen vnd hinter yn treten mit dem lincken fues vnd mit dem lincken arm vorn an den hals vnd yn über den fues wegen vnd werffen vnd haist ain ober einpruch
Ain ander stuck wider die wag
Wenn dw hawst ainen vnderhaw von der rechten seitten fellt er dir dann mit dem swert darauf das dw damit nit aufkummen magst vnd dringet dich nider in die seitten so var behentlich mit dem knopf über sein swert vnd schlag yn mit dem schnappen mit der langen schneid zw dem kopf geschicht es aber auf der lincken seitten so var aber mit dem knopf vber sein swert vnd trit mit dem rechten fues für vnd schlag yn mit der kurtzen schneid kumbt er aber indes herwider mit dem nach also mit dem stos oder schieben So denck wenn dw mit dem knopf wilt überwinden So trit wol In yn vnd wind wol vber sein arm oder hendt so mag er nit wol schiebenn vnd halt dich in der wag
Ain ander stuck wider die versatzung text
Setz an an vier enden
bleib darauf lere wiltu enden
Glosa Maister hansen Das ist wenn dw auß den vier ansetzen das sind die zwai krumpen ansetzen nach baiden seitten der pflueg mit dem ort fursich hinauß auf der erden nit krump vnd vom tag ains welches dw wilt fur dich nymbst dar ynn oder auf dem soltu pleiben vnd dein arbait verpringen vnd volenden fursich mit dem nach
Etlich nach gemainer glos sagen also wenn dw ym von deiner rechten achsel oben einhawest wiltu dann pald domit enden so merck wann er versetzt so schlag pald vmb mit der twir vnd begreiff mit dem schlag dein swert mit der lincken handt mitten in der klingen vnd setz ym den ort in das gesicht oder setz ym an die vier plössen zw welcher dw am pasten kummen magst oder kanst
