This page needs to be proofread.
XXVII r
Der Ungenannt.
Lern handt zu reiben,
Wiltu den ungenannten, den starcken treiben.
Spring und iag,
Den lincken arm überschlag.
Haw zu seinr lincken seitten mit dem Entrüsthaw, In des ruck in sein ghültz mit deinem, laß dein messer fallen, und greiff mit deiner rechten verkerten, sein rechte handt, wend dich umb, mit deinr lincken seitten an sein rechte, tritt mit deim lincken fuß für seinen rechten, und ruck den arm uff dein brust, schlahe deinen lincken über seinn rechten, leg dich mit sterck daruff, spring uff die recht seit, so brichst ihm den arm. Wiltu ihn dann werffen und halten das er nit kann auffstehn, so fall in des so du dich wendest, auff den ars, so muß er mit dir fallen.
Fah linck seinen rechten,
Die achsel stoß hinder spring im fechten.
Fahe ihm sein rechte hand mit deiner lincken verkerten, reib die umb in dein linck seit, zeuchs wol umb dich oder für dich hin, thu als wöllest ihn mit dem ghültz ins angesicht stossen, In des schreit mit deim rechten fuß hinder seinen rechten, stoß ihn mit dem ghültz oder einem arm starck forn an sein rechte achsel, reibe dich ein wenig mit dem leibe zur lincken, wirff ihn also über das rechte beyn.
Bruch.
Die achsel will er stossen,
Den elnpogen solt verdossen.
In deß so er stossen will, wie obsteht, far mit deiner linckenn handt hinden an sein elnpogen, schieb ihn von dir uff sein linck seiten. Oder schlahe deinn lincken arm starck oben über seinenn rechten, und wend dich starck uff dein recht seitten.
G iij
