This page needs to be proofread.
XXXI v
Wenn er dir einlaufft, laß dein messer fallen, und verker deine rechte handt, und greiff damit sein rechte, außwendigs, reib die handt undersich umb, und mit deiner lincken handt faß ihn beim rechten elpogen, und spring mit dem lincken fuß für, und heb seine rechte handt auff, und stoß die über deinn lincken arm, und heb ihn damit übersich uff, Ist er dir zustarck, so greiff mitt deiner rechten handt oben auff sein rechte achsel, und gewinn ihm die wage an, so magstu mit ihm thun was du wilt.
Ein ander Beschliessen.
Greiff ihm über seinen rechten arm, mit deinr lincken handt, In dem far mit deinem messer under seinn rechten arm, und fall mit der lincken hand in die mitte der klingen, far ihm damit inn sein elnbogen hinden, truck mit stercke nider, und trit genaw an ihn, heb mit deiner rechten handt übersich mit dem messer, so ist er gefaßt.
Das benemen.
Ligt er im hangenden ort,
Benim das messer on forcht,
Mit dem kurtz soltu schieben,
Mit beden schneiden dich üben.
Im zufechten, so ihr bede im hangenden ort, ligstu an seiner lincken seitten, an seinem messer, so far mit der kurtzen oder gehültz an sein rechte seitten, unnd schlahe ihm mit der langen zum kopff.
Ligt er dir also an deiner rechten seitten, unnd du ihme gegen der seinen angebunden, so far mit dem creutz oder ghültz an sein lincke seit am messer, scheubs zur rechten, In des schreit wol zu seiner lincken mit dem fuß, Schlahe ihn mit der kurtzen.
Bruch.
