der dem Dolchen, und in der versatzung begreyff sein Rechte hand mit deiner Lincken, und mit deinem rechten Arm greyff unden durch, hinder seinem Elenbogen umb seinen rechten Arm, und trit ihm vor mit deinem rechten Bein, und wend dich auff dein Rechte seyten kurtz umb, und wirff ihn uber dein recht Bein.
Item ein anders, Sticht er dir nach dem Halß, das versetz als vor, unnd in der versatzung fahr mit deiner Lincken hand aussen unden umm sein rechten Arm, also das du mit deiner Lincken hand wider von unden auff wider an dein Brust kommest, unnd mit deiner rechten Hand greyff under sein Elenbogen, und heb also von unden auff so brichstu ihme den Arm.
Item ein stuck und Bruch, Stichstu ihme zu dem Halß, und er will dir umb den Arm fallen, als vorgeschrieben stehet, so zuck den stich gar wenig wenn er dich begreyfft, und mit deiner Lincken hand greiff bald uber sein Lincke achsel, und begreyff den ort am Dolchen, so hastu ihm den Lincken Arm gefangen, und wirff ihn also mit dem Dolchen vor dir nider, oder greyff im nach der gurgel.
Ein Bruch auff das wenn er den Dolchen also bey dem ort wil greyffen, so bald als er uber fehrt mit dem Arm, so greyff mit der Rechten hand seinen lincken Elenbogen, unnd stoß den starck ubersich von dir, hinder trit ihm ein Fuß, so felt er auff den rucken.
Merckestu das er dir den Mittelstich versetzen will, so stich nit ferner dann an sein hand, bey derselben fahr behend unden durch mit verkehrter hand, also das der Knopff vorgehe, und kom ihme also mit dem Rechten arm under sein Halß, und trit in des mit deinem Rechten bein hinder
