Item jagt er auff dych mit der gleffen, wen du in der hut lygest, so far hoch auff mit der rechten hant mit dem knopff auff deynne lyncke seytten, und las den ort neben dyr nyder hengen und weys im dye gleffen also ab, und hau im zu dem kopff oder sez im an zu dem hyn renen
Item komstu nahen zu im mit der lyncken seyten und wyl er schlagen mit dem schwert, so nym das sunen zeygen, so mag er seyn nycht getan,
auch machstu den schoff gryff nemen, wan er sych myt der lyncken hant wyl weren
Item kem er dyr myt seyner lyncken seyten an deyn rechte und wolt dych mit dem sune zeygen werffen und yst er stercker dan du, so far in wennig auff uber seyn lyncken arm mit deynem rechten, oder ist er schwacher wan du, so far ausen uber seyn lyncken arm und kum deyner lyncken hant der rechten zu hylff und druck fast nider, und weycht er ab mit dem arm, so begreyff in dan mit der lyncken hant und mit der starcken rechten starck doryber und reyt vor dych, so felt er
Item hat er seyn lyncken elbogen an deynen rechten arm gesezt, so begreiff seyn lyncke hant mit deyner lyncken und nym den ungenanten gryff etc
