EIn gut Ringen auf baid seiten wen dw zv aim gest so ergreiff Im sein lincke handt mit deiner rechten handt vnd zuck Ims vber den kopff / vnd far Im durch sein vchssen vnd ergreiff Im hintterwertling bei seim lincken pain mit deiner lincken handt Vnd heb In auf mit deim Ruck vnd wurff In / auch heb Im den zuckten arm fast vber den kopff
- EIn gut ringen wen dw mit aim geleich gefast hast so wart ob dw in zu dir rucken mugst vnd In dem Rucken oder sunst wen es dir eben sey so greiff Im mit deym vntern arm durch sein pain in die gabel vnd heb In auff vnd den obern arm setz im an den hals / vnd prich In hindersich an den Ruck / aber wen dw in also auff hebst / so magstw In woll tragen vnd hubslich niderlegen wo dw hin willt
EIn ander gut Ringen wen dw gen aim gest so gedenck vnd ergreiff Im sein lincken arm bey der handt mit deiner rechten hand vnd zuck Innen vber dein kopff hinttersich vnd puck dich vnd greiff mit der anders handt durch sein pain / vnd In dem greiffen vnd In dem zucken so heb In reschlich auf vnd wurff In
