Oberhaw,
Nemlich also, Wen einer ein oberhaw vff dich hawett, so thrit ihm auß dem haw, vnd haw den haw von dir wegk. Also bricht Immer ein haw den andern, Im nach, Merck aber ein gutte Regel die hew zubrechen, Also laß keim haw sein lauff zu weit, ihe ehe du ihn fangest In der luft oder ein Mittelhaw In der weitte, Ein Vnderhaw In der nidere ihe weniger sein haw kraft hatt, Ihe weitter aber sein hew kompt ihm lauf ihe stercker er ist. Wehr disse Regel wol khan vnd versthet khan Leichtlich alle stuck brechen, sperren vnd Dempfen, nach sein gefallen
Zum andern hatt ein Jeder haw drey vnderscheidt Im brauchen oder hawen Als nhemlich ein Reitzer, ein Nhemer, ein dreffer, Das versthe also, wan einer vor dir sthet, vnd nit schlagen, hawen, oder arbeitten will, vnd du ihm auch nicht darfst frefflich einhawen, dieweil er In seinem vortheil sthet, so haw einen ober, oder vnderhew hinein, nit das du begerst zutreffenn, sonder ihn reitzest, auß seinem vortheil zuschlagen, den selben her khamenden haw nheme als dhan wegk, mit einem andern haw, das heist der nhemer, mit dissem wegnhemen blosestu ihn, als baldt haw der selben blöß zu das heist der treffer. ⁋
