Exempell ⁋
So Einer im bogenn stehett, so haw ein Zornhaw auff seinen bogenn durh, domit blößestu dich, als baldt er hawt, so nimestu Im denn haw wegk, mit einem mittelchaw, vonn der linckenn, Inndes Er auff zeicht zur versazung, so hawe im vnndenn hinein zum gesicht, vff dise vnderscheidt, wo es renn nettenn, soll man gutt achtung habenn in allem fechten ⁋
Zum drittenn soll man achtung haben vff den Wechsel der hew, Ein haw in denn anndern zuuer wehselnn, Als zum exempell, haw den ersten vonn deiner Rechtenn schlims durch sein lincken strich, von oben, Denn anderen von deiner lincken durch sein recht mittel linie, Den dritten ein apicem von oben, Ein anders, haw von deiner lincken von vnden durch sein rechten strich, Den andern durch sein linck mittel linie von deiner rehten, den dritten von deiner lincken durch sein recht achsel oder strich linie von oben, den vierten von deiner rechten durch sein lincken zum kopff wegk. ⁋
