Item nhim auß wie itzt gelert, von der lincken vbersich zur Rechten Indes haw behendt von deiner Rechten Indwendig durch sein schenckel das dein wehr neben deiner lincken vmbflig In lincken Ochsen, vnd stich vber dein handt ihm außwendig zum gesicht mit einem zutritt vff sein Recht seite, Zuck behendt wider vmb den kopff, vnd haw mitt einem abdrit von deiner Rechten, zu seiner lincken zum kopff durch das du In Lincken wechsel komest ⁋
Item Nhim von deiner Lincken von vnden vbersich auß, vnd verwendt In der luffe dein wehr neben deiner lincken In den Lincken Ochsen Indes thrit mit deinem lincken vmb sein Recht seitt, vnd wirff Im also ein stich von vnden durch den Pflug zu seim rechten hifft. ⁋
Item nhim mit halber schneidt auß dem Wechsel sein herkhomenden stich mit sterck vbersich auß, das dein wehr In der luft vmbfligt In Rechten Ochsen, Indes wirff ihm von vnden durch den Rechten pflug ein stich zu dem gemecht oder furgesetzten schenckel. ⁋
