Ochs oder ober hutt
Ittem so du Inn der Eisennportt stehst so wechsell übersich Inn Rechten ochsenn stich Er so nim aus durch das verhengen vnd stich zum gesicht, sticht Er aber müt so du Inn ochsen munerest, so hew Im durch sein handt vonn obenn, so kumestu in Lincken wechsell von dannen nim aus vnnd stich nach ⁋
Ittem stechestu Im ochsen oder Eisenport das dein cling auf seiner Lincken seitten ist, so far vnden durch vnd stich im aus wendig über sein Rechten arm Ein Inwendigen stich zum gesicht verwend vnnd hew im zum bauch durch, das dein wechr in Lincken wechsell kume, stich Indes von vnden auf Inwendig zu seim leüb ⁋
Ittem hastu dein cling auff seiner Rechten seitten, so far vnden durch vnd stich Inwendig zu seim girtel, verwend mit dem gefes auff dein Lincken vnnd haw im außwendig über sein Rechten arm, das deinn wechr wüder in Lincken wechsell kum, vnd stich vnden Inwendig zum leib mit ein austhritt
Ittem stehst in der Eisenportt, sticht er von seiner Rechten zu deiner Lincken so setz ab, vnnd haw Ein Wechr streich Inwendig durch sein gesicht so kumestu In Rechten wechsell von dannen nim aus mit verferung ⁋
Diese stuck sampt den wechsell hewen sol man Ime wechseln von Einer stuck Ins ander vnd vonn eim hew in andern, vnd die stich müt ein fieren, den wechr sich im Rapier will wehren soll dieses büechlin fleißig lechren ⁋
