Item sticht dir einer von oben zu, so ergreiff mit deiner Lincken verkherter handt, sein rechte reib ihm die vbersich vmb von dir vnd spring mit deim rechten hinder sein Rechten, vnd fahr mit dem dolchen knopf sampt offener handt vorn ahn sein gurgel, wirf ihn von dir
Bruch zihe dein rechte handt zu dir, vnd fal mit Lincken arm von aussen vber sein Rechten schwing dich mit dem schlag von dhem, vff dein Recht seitten vmb
Item sthe mit dem lincken vor, faß dein dolchen In der mitte neben deiner Rechten, das der Knopf vber der handt austhe, sticht einer auff dich, so versetz den stos mit deiner lincken, vnd stoß Indes mit dem knopf oben vber sein arm zum gesicht, vnd merck als baldt er den stos versetzen wil, so zuck wider zu dir, vnd fahr ihm von Inwendig vnden auff zwischen sein beiden armen zum kin, vberstich durch, stich ihm von oben durch sein gesicht mitt einem abthritt, ⁋
