Zwan einprechen mit Iren Ortern
Item wann du mit Dem zufechten zu dem Mann kumpst. so trit mit deinnem rechten fuosz hinnein vnd haw dich mit obern hewen zu Im. Indes scheucz Im die kurtz schneid nach seinnem gesicht. oder der prust setzt er dir das ab so haw Im oben zwifach ein zu seinnem haupt. vnd oben duplier vnden Mvndier Indes trit mit deinem lincken schennckel hinnein vnd haw Im von vnden nach seinem rechten Arm. hawt er dir dann also vnden vnd oben zu. so trit mit deinnem lincken schenckel zu Im hinein vnd verscheub Im das vnden vnd oben. mit deiner lanngen schneid. vnd In dem verschieben lasz dein kurtze schneid vnder sich gon. In. dem volg mit deinnem Rechten schennckel hinein vnd schaitel Im oben zu seinem haupt. versetzt er dir das. so haw ainnen Creitz haw nach seinnem rechten arm Inn dem trit mit deinem rechten schennckel zurruckh. raist er dir dann nach. so greiff mit deinner lincken hand In deinen duseggen. die langschneid oben. vnd stich Im den ort zu seinnem gesicht. sticht er dir den ort also zu deinem gesicht mit seinen baiden henden. so trit mit deinem rechten fuosz hinder seinen lincken In den hagcken vnd far auf Inn die Kron. so versetztstu Im den stich indes far Im mit deinnem gehultz vornen vmb seinnen hals. vnd zeuch vnden zu dir vnd oben von dir auf dein rechte seitten. so wirfstu In zuruckh.
