Ein gesichtstosz gögen dem prusthaw
Item schickh dich also In Den gesichtstosz. stannd mit deinnem linckhen fuosz vor vnnd hallt dein hellenparten auf der prust das die schneid oben gewendt sey Indes volg mit deinem rechten schenckel hinnach vnd stosz Im zu seinem gesicht. stost er dir also zu deinem gesicht. vnnd du mit deinem lincken fuosz vorstest. so gee auf mit deinem prusthaw vnnd setz Im seinen stosz darmit ab. Indem so trit mit deinem rechten schenckel hinnein vnd stosz Im zu seiner prust. versetzt Er dir das. so wechsel an seiner hellenparten durch von seiner rechten auf sein lincken seiten Inndem trit mit deinem lincken fuosz fur seinen rechten vnnd stosz Im zwifach zu seinem gesichte Stost er dir also zwifach zu. so setz Im den stosz ab von baiden seiten vnnd trit mit deinem lincken schenckel hinnein vnnd wechsel Im durch von seiner rechten. auf sein lincken seiten. vnnd stosz Im damit zu seinem lincken Arm versetzt er dir den stosz so wind Im deinen hindern Ort. von vnnden auf zu seiner prust. windt er dir also seinen hindern Ort zu deiner prust. so trit mit deinem lincken schenckel zuruckh. so ist sein winden vmb sunst. Indem stosz Im zu seinem gesicht. vnd zeuch dich damit zuruckh mit ganntzer vnnd halber hellenparten.
