Zwen ober schnit In der seges
Item schickh dich also In Dises stuckh. wann Ir zusamen gond. stannd mit deinem lincken fuosz vor. vnnd hallt dein Seges mit deiner lincken hand Inn deinem vndern hefft. dein rechten Inn deinem mitlen auf deiner rechten seiten Indes schneid Im mit deiner Seges auff seiner lincken seiten hinnumb nach seinem rechten Arm schneidt Er dir also zu. vnnd du auch mit deinnem lincken fuosz gögen Im steest. vnnd helst dein Seges auch mit deiner linckhen hand Inn deinem vndern hefft. dein rechte Inn deinem mitlen auf deiner rechten seiten. so spring inn triangel vnnd setz Im seinen schnit ab aüfwenndig vornen mit deiner Seges auf dein rechte seiten Inn dem trit mit deinem linckhen schennckel hinnein ausz dem Trianngel vnnd schneid Im nach seinem hals. Schneidt er dir also oben zu so trit mit deinem lincken schennckel zuruckh. vnnd versetz Im seinem schnid auszwendig vornen Inn dein Seges Indes trit behend wider hinnein vnnd wind dein Seges hinder deinem haupt herfur mit ainem schnit von deiner lincken seiten auf sein rechte seines haupts. vnnd trit damit von Im zuruckh.
