Zwen ober schleg Inn der Trüschel
Item schickh dich also In Dises stuckh. wann Ir zusamen gond. stand mit deinem lincken fuosz vor vnnd hallt dein Trüschel mit deiner lincken hand bey deinem vnndern Ort dein flegel vnnd stanngen Inn deiner rechten hand bey ainander. In dem schlag Im mit deinem flegel nach seinem haupt seiner rechten seiten. Schlecht er dir also oben zu vnnd du auch mit deinem lincken fuosz gögen Im steest. vnnd hellt dein Truschel mit deiner lincken hand bey deinem hindern Ort. dein flegel vnnd stanngen. Inn deiner rechten hand bey ainannder so nimb Im seinen schlag ab mit deinem Flegel auf dein lincke seiten. Indes verwechel dein lincke hand an deiner rechten stat vnnd volg mit deinem rechten schennckel hinnach vnnd schlag Im mit deinnem hindernOrt nach seinem lincken Arm Schlecht er dir also zu so henng mit deiner stanngen auf dein rechte seiten nimb Im das damit ab Indes trit Inn trianngel vnd schlag Im mit deinem flegel nach seinem. haupt. trit damit von Im zuruckh
