Ainn oberer schlag gogen ainem mitlen
Item wann Ir zusamen gond So schickh dich also Inn dises stuckh stannd mit deinem lincken fuosz vor vnnd hallt dein Truschel mit baiden hennden Inn deinner stanngen gögen dem man auf deinner rechten seiten Inn dem schlag Im mit deinem Flegel ainen mitlen schlag vmb seinen leib ginnumb von seiner lincken seiten auf sein rechte. Schlecht er dir also nach deinem leib vnnd du mit deinem Rechten fuosz gögen Im steest vnnd helst dein Truschel Inn der hoch gögen dem man. mit baiden hennden Inn der stanngen. so far vnndersich mit der stanngen nimb Im damit seinen schlag ab auf dein rechte seiten. Indes schlag Im mit deinem flegel nach seinem haupt Schlecht er dir also oben zu. so trit mit deinem lincken schennckel zuruckh vnnd far ybersich mit deiner Truschel nimb Im damit seinnen schlag hinweckh auf dein lincke seiten Indes trit mit obgemelltem schennckel wider hinnein vnd schlag Im mit deinem Fflegel nach seiner lincken seines hals trit damit von Im zuruckh.
