Der dolch gögen dem schwert
Item hallt dich also mit Disem stuck mann ir zusamen gond stannd mit deinem linken fuosz vor vnnd hallt dein schwert gögen dem man vor deinem gesicht Indes haw Im nach seinem haupt hawt er dir also oben zu vnnd du mit deinem lincken fuosz gögen Im steest so trit mit deinem rechten behend hinnein vnnd versesz Im seinen haw mit deinem Dolchen auf deinem rechten arm wol bey dem hefft Inn sein klingen Indes greiff Im mit deiner lincken hand Inwendig uber sein hefft Inn seinen rechten arm truck damit auf dein lincke seiten vnnd stich nach seinem gesicht Sticht er dir also oben zu so lasz dein lincke hand von deinem knopff deines schwerts greiff damit In sein lincke vnnd scheub die über sich so nimbstu Im seinen stich hinweck Inn dem trit mit deinem lincken schenckel zurück reisz damit dein rechte hand an dich vnnd mit deiner lincke greiff wider umb In deinen knopff indes haw Im nach seinem haupt trit damit von Im zuruckh
