Ein vnder abnemen gögen ainem obern gesicht stösz
Item schickh dich Allso In das abnemen stee mit deinem Rechten fuosz vor. vnnd hallt dein tolchen. vor deinem rechten knie. stat er dann auch mit seinem rechten fuosz gögen dir seinen tolchen Inn der hoch gögen deinem gesicht. den daumen ob_ seinem knopff. so volg mit deinem lincken schenckel hinnach vnd gang von vnden auf mit der Scheer vnd stosz Im nach seinem gesicht. stost er dir also nach deinem gesicht. so nimb seines stoss eben war vnd greiff mit deiner lincken hand Innwendig In seinen rechten Arm vnd setz Im seinen stösz damit ab. Indes stich Im zwifach nach seinem gesicht sticht Er dir also zwifach zu. so nimb Im das ab mit deinem tolchen. Im den setz Im dein lincken hand vnder seinen rechten Elnpogen vnnd scheub In von dir auf dein rechten seitten. begert er dich also von Im zuschieben. so trit mit deinem lincken schenckel hinein vnnd greiff mit deiner lincken hand auf sein lincke. truckh damit vnder sich. so wirfstu von Im ledig. Indes stoss Im behend nach seinem gesicht. vnnd Indem einstossen. greiff mit deiner lincken hand vnnder sein rechte Ochsen. vnnd scheub Im mit sterckh von dir.
