Ain wurff mit ainem mordstich in dem Kampf
Item wann Ir zusamen gond So hallt Dich also mit disem stuck stannd mit deinem rechten fuoß unnd halt dein Schwert mit diener rechten hand in deinem hefft auf deiner rechten seiten neben dem haupt deinen Schildt Inn deiner lincken vor deinem Leib inndem volg mit deinem lincken schennkel hinnach unnd Wind Im deinen Ort deines Schwerts mit ainem Stich zu seinem Fisier. Sticht er dir also oben zu unnd du mit deinem lincken fuoß gögen Im steest unnd helst dein Schwert mit deiner rechten hand Inn deinem hefft auff deinem rechten Schenkel den Ort gögen dem mann deinen Schildt Inn deiner lincken hannd hannd vor deinem Leib so nimb Im das ab mit dein Schildt Indes stich Im mit deinem Schwert nach seiner lincken seiten Sticht er dir allso zu so trit mit die nem lincken Schennkel zu ruck unnd nimb im das ab mit deinem Schildt auf dein lincken Seitten Indes trit behend wider hinnein unnd setz im mit deinem Schildt an seinen Leib scheub Im damit von dir unnd mit deinem lincken fuoß schlag Im den Hacken umb seinen lincken zeuch damit zu dir Indes stich Im ainen Mordstich zu sein linkce seiten so stichst In zu der Erden
