fues vnnder sein rechtenn vnnd heb do mit auf so felt er
wenn dw im obenn ein haust verseczt er denn haw mit der twier so far hoch auf mit dem swert vnd henng im den ort vber sein swert zu dem gesicht vnd secz im an
oder
wenn dw im den ort vber sein swert gehangenn hast chumbt er denn recht an dich
so far mit dem rechten arm vber sein dencken vnd henng im den ort zu dem gesicht pleybt er am swert vnd reyt an dich so far mit der tencken hand in wenndig auf vber sein rechtenn arm vnd slach im den zem dar mit darvber vnd pegreyff mit der tencken verkerten hand deinen zaum wider vnttenn seiner rechtenn arm also ist er verslungen vnd gefangen mit dem zaum
[S]tich im aus den neben huett zw dem gesicht wert er denn stich vnnd reyt domit an dich so pegreyff sein rechte hand mit deiner tennckenn vnd arbait mit dem swert oder würff in mit dem schaffgriff oder mit andernn ringenn
wenn dw im aus der huet von rechten pain denn ort lang ein scheust so wind die churcz sneyd an sein swert vnd stich im zu dem gesicht falt der stich vnd er reytt neben deiner seytenn der rechtenn hin weck so haw im mit der lanngen sneyd hinden zu dem hals
Hie merck wie dw die hew vnd Stich solt ab seczenn
Wenn dw zw im reytest so halt dein swert mit dem chnopf an denn satelpogenn hawt er dir dann oben ein zw dem chopf zu deiner tencken seytenn so far auf gegen seinem haw vnd wind die churcz schneyd an sein swerdt vnd stich im zu dem gesicht
oder
hawt er dir oben ein zu der rechtenn seytenn so far auf vnd wind im die lanngen sneyd an sein swert vnd stich im zw dem gesicht vnd also sold dw auch abseczenn was er auf dich sticht es sey mit dem swert oder mit der gläffen wan die abseczenn vnd die winden sein die grosstenn chunst zu ross
Der techst vonn den plossenn
wenn denck die ploss
suech messer nit wartt klöss
glosa Wenn dw als nachet in chümbst das dw im den zaum gefangen hast oder sein rechte hannd gefangenn hast mit deiner tenckenn pegriffenn hast so sold dw gar ebenn pedennckenn zw welcher ploß dw in am pestenn gewinen mugst ob dir in der neben dem swert zw lannck wurd das dw da mit nit gearbaitenn mügst so arbait mit mit dem tegen oder sunst mit andern churczen wern vnd ob dw zu deiner wer nit chumen magst so nym im die sein vnd arbait da mit zw den plössenn zu wellicher dw am pestenn chumen magst das ist vnder gesicht oder vndennr [!] den vechsenn oder auswenndig auf der hant jn den handschuchen oder jn wendig in der hand zu dem tener vnd In allen gelenckenn des harnasch
Das ist der text
zwen stuch lernen
mit lär hant gegn der wer
glosa
