Wild dw Im zw der tenncken seytenn an reytenn so sold dw im auch starch an pinden vnd wart ob dw im mügst an geseczen da mit twingstu In das dw magst chumen zw anndernn straichen
Wenn dw zu der rechten seyten zw reyttest so haw Im starck ein vnd scheus Im den ort ein zw dem gesicht verseczt er vnd sticht dir wider ein so var mit tencken arm In wenndig wider aus vber sein swert vnd druchk es also mit dem arm also In dein tenncke seytenn vnnd rewt fur dich so nymbstu sein swert
[W]enn dw im zw der seinen tenncken seytenn zw reytest vnnd im zw hawst verseczt er vnd chumbt do mit so nachenn an dich so pegreyf mit der tencken hand sein rechte vnd arbait mit dem swert oder wart des ringen
ob dich das ros vertrueg das dw zw chainem stuck magst chumen so lass dein ross nicht weyt lauffenn darvmb das es nit müed werde vnd dw auch ge ruet pleybst vnd wendt dich zw im zu der seytenn do dich dunck da dein vortail am pestenn mit chunnst mügst gehaben
wenn dw mit im zu samen reytest hast dw denn ein swert vnd er auch aines wär dann sach das dw andanchs zw seiner tencken seyten müest reyten so leg dein swert auf dein arm In die huet hawt er dir denn oben zw dem chopf so far auf vnd versecz mit der langen sneyd das dein daumen vnden chemen vnd reyt an In vnd begreyff mit der tenncken hand sein rechte vnd stos in mit dem chnopf vnder das gesicht
oder far Inwendig auf mit dem rechten arm vber sein rechte hannd vnd druck sy also vast In dein tenncke seytenn vnd stös in oben mit dem chnopf vnd reẅt nebenn im weck so nymbstu im sein swertt
Wenn dw rewtest zu seiner tencken seyten vnd hast ein swert so leg es auf denn tennckenn arm in die huet haut er dir dann oben ein zw dem chopf so versecz mit der lanngen sneydt das dein daumen vnden sey vnd haw im aus der versaczunng einen freyen zw dem chopf
ob das wer das er dir dein ruck abgewunn oder hinden an dich cham mit an seczenn es war mit einem spies oder mit einem swert so merck wil er dir hindenn seczen an so wend wend [!] dich aus dem stich gegen Im auf dein rechte vnd hurt mit an vnd arbait mit swert oder mit dem ringenn
ein behenndichait mit der glaffenn
wenn dw vor im wegk jagst vnd hast ein gläffen vnd er dir nach auch mit ainer so halt die dein auf der rechten achsel vnd merck wen er da hinden an dich chumbt so heb dein gläffenn vber das haubt auf dein tenncke achsl vnnd wend dich gegenn im auf dein tenncke seyten vnd slach da mit die gläffenn vnder deim arm also chümbst dw im gerad vnnder die augenn
wenn dw hast ein swert vnd er ein gläffen so leg dein swert auf dein tennckenn arm In die huet reyt er denn mit der glaffenn auf dich zw deiner tenncken seytenn so reẅt sitiklich wider gegen im vnd wenn es chumbt zw dem treffenn so far auf mit dem chnopf vnd la die klingen nyder hangen vnnd secz im die gläffenn obenn gegen deiner tencken seyten vnd haw im chnopf zw vnd secz im an oder rewt er dir zw deiner rechtenn seyten so streich slecht auf mit dem swert zw deiner rechten seyten an die glaffenn vnd wind im das vber gehenng vnd stich im zw dem gesicht
wie dw im sein swert oder meser nemen
sold an alle scham vnd in dannoch pey der da er sein swert in gehabt hat das stuck treyb also reyt zw seiner rechtenn seytenn vnd haw im oben starck ein zw dem chopf vnd stich in do mit zw dem gesicht verseczt er denn stich so hurt an in vnd begreyff mit verkerter hannd sein rechtenn arm voren vnter dem chnopf seins swercz vnd halt also vest vnnd peug denn tennckenn arm auf wercz an dem gepind seins swertz so mues er das swert lassenn fallenn dennoch hast dw sein hannd vnd magst in slachenn stechenn werffenn
Nu merchk das stuck haist der vngenannt griff wenn man macht damit einem starchen all sein hew vnd stich en nicht ann alles fechten wen man in recht do // mit pegreyfft[1]
Wenn dw chumbst mit der tenncken seytenn ann sein rechte Hat er denn sein swert gezogenn oder sein meser vnnd will dich slachenn oder stechenn so be
- ↑ Steht nach der nächsten Zeile.
