Denn nicht vest so begreyff sein rechte hand mit deiner rechtenn vnd zeuch In also do mit fur dich vnd mit der tenncken faß in bey dem elpogenn vnd mit dem tencken fueß schreyt fur sein rechtenn vnd ruchk in also dar vber so velt er oder wenn dw in mit dem rechten arm fur dich zeuchst so val im starck mit der prust darauf So prichstu im den arm
wenn er dich anfelt mit ringen so begreyff mit der tencken hannd sein rechten Arm vorn bey der hand vnd ruck in zw dir auf dein tencke seytenn vnd slach dein rechtenn arm mit sterck vber sein rechtenn in das gelenck des elpogenn vnd prich mit der tencken hand sein rechten arm vber deinen rechtenn fueß vnd spring mit dem rechten fueß hinder seinen rechtenn vnnd würff in dar vber
wenn dw chumbst mit dem leyb nachet an In fert er dir dann mit dem tencken arm fur dein rechten achsel vmb den hals so var mit dem rechten arm aussen vber seinen tencken vber das gelennck des elpogenn vnd chum mit der tenncken hannt der rechten zw hilf vnd druck do mit vndersich vnd spring mit dem rechten fueß fur sein tencken vnd went dich von Im auf dein tencke seytenn so velt er
wenn er dir felt mit paidenn hennden In denn arm vnd fert dir domit durch hinden vmb denn leyb so schlach mit dem rechten arm starck von oben nyder In das gelennck seins tencken elpogenn vnd schreyt mit dem rechtenn fueß für sein denncken vnnd wennd dich von Im
wen dw In hast geuast bey dem arm vnd er dich wider hat er denn einen fues fur geseczt vnnd helt denn gerachkt so stoß mit einem fueß auf das selbig knie vder stos in zw denn hodenn vnd wart das er dir denn fuess nit begreyff da mit dw im zue stost oder wenn dw ein fues vor seczt so peug das knye fur dich so mag er dir mit dem stoß zw dem chnye nit geschadenn vnd das merck gar eben
wenn dw mit im ringen wild greyft er denn nach dir mit aufgedanen oder mit gerechten fingernn oder begreyft dich mit ringen vnd helt dich vesst so wart dw ob dw In mit einem finger begreyffen mugst vnd prich im denn vbersich vnd fuer in do mit zw dem kraiß da mit gewingst dw Im auch die seyt ann vnnd sunnst vortail vil
wenn dw in nyder würffst vnnd er felt auf d seinen pauch vnd reckt den arm von Im vnnd knye ym pald mit einem chnye auf seinen arm In dem glenck des elpogenns vnd begreyff Im den selbigenn arm vorn mit einer hannt vnnd ruck do mit vbersich so pricht er
[W]yrfst dw In nyder vnd felt auf seinen pauch so sicz pald auf in vnnd begreyff in bey einem arm vnd zuck in den auf seinem ruck vnnd halt den vest mit einer hant so chan er nit auf chomen oder wild dw im den arm prechenn den dw im heldest mit der ainen hannt so heb mit der anderen hannt den elpogenn vber sich so prichst dw Im denn arm
wurffs dw in nyder vnd er felt nyder auf denn ruck so val im mit dem leyb die twier vber sein anntlücz vnd faß in bey dem hals vnden einen arm vnd halt in also vast vnd mit der anndern hannt ruck Im die hannd aus da mit er sich behelffenn wil so mag er nit auf chumen
Der text vonn der wer die zw dem chambp gehort
In aller ler
dein art gegen der plos ker
Ist das dw mit aller wer die zw dem champf fechten gehort wissen solt mit denn orttern an dem gewapnetem man die plöß recht
