sin schwertt vnd schlag In mit der kurtzen schniden zu dem kopf vnd dz heissett die schnoppen oder die schnellen ~
Vier sint der schnidt
Vier seÿn der schnÿdtt
Zwen vnten zwen oben mit
Merck die vier schnidt des ersten die zwein obern die gehoren zu triben gegen den vechtern die vß der versatzüng oder vß dem band des schwertz gern vmb schlagen zu der andern siten vnd brich ee mit dem schnidt also wan er dir mit dem versetzen oder sünst an din schwert bind zu diner lincken siten vnd schlecht do mit bald vmb mit der wer oder sünst zu diner rechten siten so spring vß dem haulb mit dem lincken fus vff din rechte siten vnd fall im mit der langen schniden oben vber beid arm vnd truck mit dem schnid von dir dz soltu triben von beiden sitenn alwegen wan er vß der versatzüng vmb schlechtt ~
