Ein stueck
Item Arbeÿt er mit dir hoch vnd stich dir zu dem gesicht so stich von vnten auff zwischen sinen beÿden armen vnd vber sin lincke achsell / begriff ÿm mit diner hant hintter seyne lincke vnd wurff din schwert mit dem pÿntt auff din lincke achsell vnd griff mit diner rechten ym yn sin rechten elnbogen / stoß vast von vnten auff vnd nim dz gewichtt so plybt dz swert vnder seynen lincken arm zwüschen uwer peÿden ~
Aber ein stück
Item Arbeit er aber hoch mit dir so stich aber vnten auff zwuschen sinen beÿden armen vnd loß din lincke hant varn von der clingen vnd griff oben zu vber din swertt riesch vnd begriff din swert wider bÿ der clingen vnd stos ÿm beÿde swertt vber den hals hinten vber sin ruck gar ab hÿn ÿn sein beÿd knÿebug vnd reiß vast untten an dich vnd mit dem haupt stoß vast von dir so wurfstu ÿn auff den ruck ~
Ein bruch dar wider
Item Wer dir dz thün will vnd will dir die beÿde swert vber den hals stoßen so far mit diner rechtenn hant in sein lincke siten vber sin ruck vnd schrit mit dinem rechten peÿn vorn fur sein linckes peÿn vnd würff yn vber die hueff der bruch gett zu beÿden siten zu ~
