dem zuvechten zu Im kumbst. pindt Er dir den oben an gegen deiner linckhen seiten. so wind die kurcz schneid an sein schwert vnd var wol auff mit den armen. vnd heng jm den ort oben en. vnd stich jm zu dem gesicht. verseczt Er den stich mit sterckh. so laß Im den ort am schwert obenn ein hangen. vnd wind auff dein rechte seiten. vnd stich. dz seind zway winden an ainer seiten des schwerts.
pindt Er dir oben an gegen deiner rechten seiten. so wind auch gegenn deiner rechten seiten. die lang schneid an sein schwert. vnd var wol auff mit den armen. vnd heng jm den ort oben ein. vnd stich Im den ort oben ein zu dem gesicht. verseczt Er den stich mit sterckh. so laß jm den ort am schwert oben ein hangen. vnd wind auff dein linckhe seitten. vnd stich das seind vier winden. auß den obern zwayen anwinden vnd der linckhen vnd rechten seitten.
Nu soltu wissenn. das du auß den vndern zwayen anpinden. auch solt treibe(n) vier winden. in allen geferten. als auß den obern. also wer/dort der winden oben vnd vnden acht. vnd gedenckh das du auß winden besunder solt teiben ein haw. ein stich. einen schnit. das haissent drey wunder. darumb das mans zu vier vnnd zwainczig malen auß den acht winden treiben mag. vnd die acht winden soltu wol lernen treiben von bede(n) seitten. also das du mit jedem winden zu schreitest. vnd das man prueff sein gefert. nit mer ob Er damit waich oder hert am schwert ist. vnd wenn du dis zwayding enpfinde(n) hast. so treib die stuckh gerecht die zu den winden gehören. ob du das nit thuest. so wirstu bey allen winden geschlage(n)
