Gefangen nemen.
Endtlich / so du einen geworffen und zu fall bracht / so knie im zwischen bed beyn uff sein gmacht / faß im bede hend / oder die gurgel / truck fast allenthalben zur erden / so behelstu ihn.
Bruch.
Bistu ie vergwaltigt unnd undergeworffen / hab eilends gut acht / das dir dein hend nit verschlossen / sonder far im gleich mit einer handt ins angesicht / den daumen unders kinn / die anderen finnger under den augapffel / greiff also starck / mitt der andern handt stoß ihm starck neben zur blasen / streck einen schenckel der dir am ledigsten / ziehe ihn geschwind wider an dich / so gibstu ihm ein guts zu den hoden / Mitt disen dreien griffenn zu einem mal magstu ihn von dir bringen.
