Page:Gründtliche Beschreibung der Kunst des Fechtens (Joachim Meÿer) 1570.pdf/217

Ein Exempel vnd stck / wie du von Vnden zur Blóß arbeiten solt.

WAñ du nun also in gerader Versatzung für deinen Mañ komest / alda mercke wañ er dir vornen zum Gesicht hauwen will / so wende die Lange schneide gegen seinem hauwe / vn fange jm den in der lufft gegen seiner Rechten auff / zu dem so tritt vnder dess mit deinem lincken Fůß hinder deinem Rechten zu jm / vnd volge mit deeiné rechten Fůß behend fürbaß nach gegen seiner Lincken / als bald sein Streich also auff deinem Dusacké bochet / so wende dein Lange schneide wider ab vó seinem Dusacken / vnd ziehe jm die Lange schneide gegen deiner Rechten durch sein Maul / in des zuck aber behend widerumb / vnd hauwe ein Mittelhauw / mit gůter Versatzung gegen seiner Lincken / zu seinem Gesichte / also das du jm mit solchem Mittelhauw / sein hauwe (wo er anderst hauwen wurde) auffhaltest / oder abweisest / nach solchem Mittelhauw zucke behend widerumb deiné Kopff / vñ schnell jm außwendig zu seinem rechten Arm / als bald hauwe mit kreutzstreichen Lang von dir / den Schnit vnd den hindertrit soltu zůgleich mit einander volbringen / so gehet das stuck wol an.

Ferner hauwet er die vornen zu deinem Gesichte / so wende dein lange Schneide gegen seinem Hauw wie vor / als bald die Dusacken zusamen bochen / sd zucke deinen Dusacken wider zu ruck ab / vor deinem Gesicht vmb / vnd hauwe außwendig zu seinem rechten Arm / demnach hauwe den andern mid behend vornen durch sein Gesicht.

Ein anders.

JTem versetze jm seinen Oberhauw wie vor / mit langer Schneide / vñ in dem die Dusacké zusamen bochen / so rucke dein gehültz vbersich / gegen deiner Lincken das du vollend in den lincken Stier ankomest / von dañen hauwe einen Vnderhauw oder Mittelhauw / oder auch schlims oberhalb seinem rechté Arm gegen seiner Rechten durch sein Gesicht / gewaltig vnd lang von dir / als bald hauwe ferner mit kreutzstreichen Lang nach / auch durch sein Gesicht.