deinem stich antriffst / wider gegen seinem herfliegenden Wehr (wo er anders hauwen oder stechen würde) verwendest / dann so bald er deines nachreisens gewahr wirdt / wird er als bald mit seiner Wehr wider zů der deinen eilen / vnnd hieneben zůgleich deiner gegebenen Blóß (so du mit solchem nachreisen vnnd zůlangen geóffnet hast) zů eilen vnd die anfallen / welches du jhm als dann mit gegen schneiden Verwenden wider absetzen abschneiden vnd nemen kanst.
Item bindestu jhm mit deiner kling an die seine / so merck vnd fúhl als bald er mit seiner abgeht von dem band vmb zůschlagen / oder zů einer andern seiten zů stechen / so folg jhm (in dem er ab geht) mit einem stich gerad zůgegen seinem leib / vnd wende die Lang schneid beide jm hinein stechen vnd jm heraus fahren / alwegen gegen seiner kling / also ist hie fúhlen nicht anders dann brieffen / empfinden / wie vnd wann er von deinem band abgehn wil / das du jhm als bald vnnd behend kónnest vnd wissest sicher nach zů folgen / wie im Schwerdt auch gemelt.
Bleiben vnnd zůcken bistu auch hie vor im Schwerdt gelehrt / Wenden aber ob du wol solches hieuor auch gelehrt / so ist solches doch hie anders zů gebrauchen / vnd das also / so offt du deinem widerpart anbindest in die mitte seiner klingen / so solt du von dannen ohn sondern vortheil nich abgehn / vrsach er móchte dich mit nachreisen vbereylen wie hieuor gelehrt / sonder bleibe hart mit dem band an seiner klingen / vnd wende die halb schneid oder den vordern ort einwerts gegn seinem leib vnd setz an / wehret er das vnd truckt dir die kling zůr seiten aus / so zůck behend vnden durch vnd stich mit einem abtrit zůr andern seiten.
Wo er dirs aber nicht zůr seiten außfúhret / sonder als bald er dein einwenden merckt / tringt er mit einem stich stracks fúr jhm hin zů deinem leib / wirstu solches gewahr / so bleib gleichwol mit deinem ort an seinem leib / vnd wende mit deinem gefeß sampt der langen schneide vndersich wider gegen seiner klingen / wind jhm also seinen ort aus / vnnd tring ferner mit dem stich
