dem band nit kommen mag, Also hastu ihn aber verrigelt.
¶ Der ungenant.
Lern handt zu brust reiben,
Wiltu den ungenanten, den starcken treiben.
Spring und jag,
Den lincken arm überschlag.
Haw zu seinr lincken seitten mit dem Entrüsthaw, In des ruck in sein ghültz mit deinem, laß dein messer fallen, und greiff mit deiner rechten verkerten, sein rechte handt, wend dich umb, mit deinr lincken seitten an sein rechte, trit mit deim lincken fuß für seinen rechten, und ruck den arm auff dein brust, schlahe deinen lincken über seinen rechten, leg dich mit sterck darauff, spring uff die recht seit, so brichst ihm den arm. Wiltu ihn dann werffen und halten das er nit kan auffstehn, so fall in des so du dich wendest, auff den ars, so muß er mit dir fallen &c.
Fah linck seinen rechten,
Die achsel stoß hinder spring im fechten.
Fahe ihm sein recht handt mit deiner lincken verkerten, reib die umb in dein linck seit, zeuchs wol umb dich oder für dich hin, thu als wöllest ihn mit dem gehültz ins angesicht stossen, In des schreit mit deinem rechten fuß hinder seinen rechtenn, stoß ihn mit dem gehültz oder einem arm starck forn an sein rechte achsel, reib dich ein wenig mitt dem leib zur lincken, wirff ihn also über das rechte beyn.
Bruch.
Die achsel wil er stossen,
Den elnpogen solt verdossen.
In deß so er stossen wil, wie obsteht, far mit deiner linckenn hand hinden an seinen elnpogen, schieb ihn von dir auff sein linck seiten. Oder schlahe deinen lincken arm starck oben über seinenn
