dessus, où dessoub main porte la tienne du dedans, & pare du fil de l’espee en appuiant le bras gauche, & passant du pied gauche ensemble, & tu demeureras maistre de l’arme de ton ennemy.
Mais s’il te tire un revers tu pareras de seconde en accompaignant le manteau de ton espee & incontinant tu luy donneras une estoquade en l’estomac.
Sy avec l’espee & le manteau tu veus assaillir, porte luy une estoquade sous main, & par ainsi tu pourras par necessité contraindre ton ennemy a parer, & comme il parera du dedans tu abbaisseras la pointe, & luy donneras un estramasson, & de ce coup tu luy osteras son espee, tant ce coup a de force, tu le frapperas mesme de pointe, de revers ou d’un coup sur la teste. Autre maniere plus bresve, tu iras tirer un droit sur la teste de ton ennemy afin qu’il pare, & ce pendant qu’il parera, tu passeras du pied gauche, luy donnant une jarretiere.
