Zwen Armschnit.
Item schick dich also in dises stuck, Wann Ir zusamen gond, stand mit deinem rechten fuß vor, vnnd halt dein Sichel in deiner rechten hand gegen dem Mann, dein lingge auff deiner linggen hüff, In dem schneid Im nach seinem rechten arm, Begert er dich also zuschneiden, vnd du auch mit deinem rechten fuß gegen Im steest, vnd heltst dein Sichel in deiner rechten hand gegen dem Mann, so greiff Im mit deiner linggen hand vornen in seinen rechten arm, nimb Im seinen schnit damit hinwegk auff dein lingge seitten, vnd faß Im die obgemelt hand starck, schneid Im damit nach seinem rechte~ arm, Hat er dich also gefaßt, vnd angesetzt, so erwisch Im mit deiner linggen hand sein rechte, vnd trit mit deinem linggen schenckel hinein, scheub Im die damit starck vbersich uber sein haubt, In des zuck dein rechte hand behend an dich, vnnd schneid Im mit deiner Sichel nach der mitte seines Leibs, Schneidt er dir also zu, so greiff Im mit deiner linggen hand von vnden außwendig uber seinen rechten arm, truck damit starck zu dir, so magst du Im den arm brechen, In dem schneid Im nach seinem hals, vnd trit damit von Im zurugk,
